Ar 1 Tachwedd 2021, daeth Vicki yn Brif Weithredwr QAA, ar ôl ymuno â'r Asiantaeth yn 2019 fel Cyfarwyddwr Gweithredol Gweithrediadau a Dirprwy Brif Weithredwr.

Cyn ymuno â QAA, bu Vicki yn gweithio yng Ngholeg St Hugh, Rhydychen, lle'r oedd hi'n Drysorydd (Prif Swyddog Gweithredu), yn un o gyfarwyddwyr Oxford Limited, St Hugh's Conferences, St Hugh's Estates ac yn un o gyfarwyddwyr sylfaenol NOSCS. Bu hi'n gweithio ym Mhrifysgol Birmingham hefyd fel Cyfarwyddwr Cynllunio Strategol, ac mewn rolau amrywiol ym Mhrifysgol Warwick ac Ysgol Fusnes Warwick. Cychwynnodd ei gyrfa mewn addysg uwch yn UMIST, lle bu'n gweithio ym maes recriwtio myfyrwyr rhyngwladol. Mae gan Vicki brofiad hefyd o weithio yn y sector masnachol a'r sector elusennol. Mae hi wedi rhedeg ei chwmni ei hun ac wedi bod yn gyfarwyddwr elusen yn gweithio gyda menywod a theuluoedd a effeithiwyd gan gam-drin domestig.

Daeth Caroline yn Brif Swyddog Gweithredol a Chyllid yn QAA yn 2024, ar ôl gweithio fel Cyfarwyddwr Cyllid ers 2019, a Phennaeth Cyllid a Chynllunio cyn hynny. Mae hi'n gyfrifol am reolaeth strategol adnoddau ariannol a chynllunio QAA. 

Cyn ymuno â QAA, roedd Caroline yn Bennaeth Cyllid gyda Karen Millen ac yn Gyfarwyddwr Cyllid yn Nelson Thornes. Mae ganddi hefyd brofiad helaeth o weithio fel cyfrifydd ac archwilydd ariannol ar draws nifer o wahanol sectorau diwydiant. Mae Caroline wedi graddio o Brifysgol Manceinion.

Mae Tom yn arwain y Tîm Llywodraethu a'r Swyddfa Weithredol, ac ef yw Ysgrifennydd Cwmni QAA. Mae cyfrifoldeb ganddo hefyd am y tîm Polisi a Chyfathrebu a'r tîm Marchnata a Digwyddiadau.

Hyfforddodd Tom fel ymgynghorydd rheolaeth a strategaeth yn Llundain a Chicago, a gweithiodd yn bennaf i gleientiaid yn y sector cyhoeddus, yn ogystal â gweithio mewn rôl fewnol yng nghwmni cyfreithwyr Freshfields. Yn 2005, ymunodd â'r Gwasanaeth Sifil, lle gweithiodd mewn cyfres o rolau yn ymwneud â pholisïau cystadleuaeth, ynni a newid hinsawdd, a nifer o rolau mewn cyfathrebu yn cynnwys swyddog y wasg a chyfansoddwr areithiau gweinidogol. Roedd yn arweinydd gwariant yn Nhrysorlys ei Mawrhydi adeg Adolygiad Gwariant 2010. Ei rôl derfynol yn Whitehall oedd ei waith i UK Government Investments, sef canolfan ragoriaeth Llywodraeth y DU mewn llywodraethu corfforaethol a chyllid corfforaethol. Yn 2017, derbyniodd swydd Is-lywydd (Strategaeth) yn Labordy Niwclear Cenedlaethol y DU, cyn iddo ymuno â QAA ym mis Ebrill 2020.

Mae Eve Alcock yn Gyfarwyddwr Materion Cyhoeddus yn QAA lle mae'n arwain gwaith polisi, perthnasoedd â rhanddeiliaid a chyfathrebu'r sefydliad. Mae hi hefyd yn Gymrawd ar raglen gymrodoriaeth Rising Leader Aspen UK. Cyn ymuno â QAA treuliodd ddwy flynedd gyda’r Sefydliad Aer Glân, mudiad elusennol rhyngwladol sy'n mynd i'r afael â llygredd aer yn fyd-eang, lle bu'n gweithio ym meysydd cyfathrebu, eiriolaeth a phartneriaethau strategol. Mae Eve wedi cadeirio Pwyllgor Cynghori Strategol Myfyrwyr QAA yn flaenorol fel aelod bwrdd annibynnol. Daw ei chefndir yn y sector addysg uwch o ddwy flynedd fel Llywydd Undeb Myfyrwyr Prifysgol Caerfaddon, lle bu hefyd yn llywodraethwr y Brifysgol ac yn Gadeirydd Bwrdd Ymddiriedolwyr yr UM. Mae hi'n angerddol am gyfiawnder cymdeithasol, bwyd Corea a choffi da.

Debra Macfarlane yw Cyfarwyddwr Gwasanaethau Rheoleiddio QAA. Ymunodd â QAA yn 2013. Yn broffesiynwr ym maes ansawdd, mae gan Debra gefndir eang mewn addysg drydyddol, gyda ffocws penodol ar ansawdd, asesu, adborth a chyflogadwyedd. Mae ei gyrfa’n cynnwys rolau mewn prifysgolion a diwydiant. Rhwng 2021 a 2023, cafodd Debra ei secondio i Gyngor Cyllido’r Alban, lle bu’n gweithio ar ddatblygu ymagwedd drydyddol at ymdrin ag ansawdd ar gyfer colegau a phrifysgolion yr Alban, cyn dychwelyd i QAA yn 2023 i roi’r trefniadau hynny ar waith.

Mae gan Debra gymwysterau israddedig ac ôl-raddedig o Brifysgol St. Andrews, Tystysgrif Ôl-raddedig mewn Ymarfer Academaidd o Brifysgol Glasgow, ac roedd yn gyn Ysgolor Coffa Robert T. Jones ym Mhrifysgol Emory yn Atlanta.