Roeddwn i eisiau bod ar bwyllgor cynghori strategol y myfyrwyr oherwydd mae gen i ddiddordeb mawr mewn rhoi mewnbwn pellach i QAA ar sut mae myfyrwyr yn cael eu heffeithio gan newidiadau yn y sector. Rwy'n meddwl bod y math hwn o ofod yn hanfodol i sicrhau bod lleisiau myfyrwyr yn cael eu cynrychioli ar bob lefel o wneud penderfyniadau mewn addysg uwch ac, yn bwysicaf oll, ein bod yn ymwneud â nhw fel partneriaid yn hytrach na dim ond defnyddwyr gwasanaethau a ddarperir gan wahanol sefydliadau. Mae’r cyfle i fod yn rhan o’r trafodaethau hyn a chadeirio’r pwyllgor hwn yn un rwy’n ddiolchgar iawn amdano. 

Rwy'n meddwl mai'r ffordd orau o brofi ansawdd sector yw trwy ofyn i'r rhai sydd wedi elwa’n uniongyrchol ar ei lwyddiannau, a’r rhai yr effeithwyd arnynt gan ei ddiffygion. Mae cyfyngiadau ar ba mor bell y gall unrhyw sgyrsiau am ansawdd AU fynd, oni bai bod myfyrwyr yn rhan o’r broses honno. Mae cyfranogiad myfyrwyr yn y broses hon yn ein galluogi i brofi a thrafod unrhyw newidiadau arfaethedig â’r bobl a fydd yn teimlo eu heffaith yn fwyaf uniongyrchol. Gall hefyd fod yn gyfle addysgol i fyfyrwyr, fel y gallant weld beth ddylai'r safonau fod, o gymharu â'r rhai a welant yn eu profiad addysgol o ddydd i ddydd. 

Mae rhywbeth gwirioneddol bwerus ynghylch grymuso myfyrwyr i newid y cymunedau y maent yn rhan ohonynt er gwell. Dyna genhadaeth yr UM yr wyf yn swyddog ynddo, a dyna sydd wrth wraidd pob penderfyniad a phrosiect yn y rôl hon. Mae gwahaniaeth enfawr mewn prosiectau, cynlluniau, ac ymgyrchoedd pan fydd myfyrwyr yn cyfranogi ac yn teimlo bod ganddyn nhw berchnogaeth o’r mentrau hynny, o'i gymharu â phan rydyn ni'n trefnu rhywbeth yn fewnol a'i gyflwyno i fyfyrwyr fel cyfle i gymryd rhan. Yn yr enghraifft gyntaf, mae myfyrwyr hefyd yn cael profiad o drefnu cymunedol yn ogystal â chynrychioli eu cyfoedion. Yn syml, mae ymgysylltiad myfyrwyr yn gwella pob agwedd ar eu profiad prifysgol (academaidd, adeiladu cymunedol, ac allgyrsiol).

Mae Alex wedi bod yn Is-Lywydd Addysg Uwch yn Undeb Cenedlaethol y Myfyrwyr ers Gorffennaf 2024. Ei brif rôl yw cynrychioli myfyrwyr mewn Addysg Uwch ac eirioli ac ymgyrchu dros eu buddiannau. Cyn gweithio i UCM, treuliodd flwyddyn fel Swyddog Addysg yn Urdd Myfyrwyr Caerwysg, a cyn hynny astudiodd Wleidyddiaeth, Athroniaeth ac Economeg ym Mhrifysgol Caerwysg.

Mae Alex wrth ei fodd yn grymuso llais y myfyriwr ac yn ei gweld yn hollbwysig bod gan fyfyrwyr y gallu i fwydo i mewn a chyd-greu’r system addysg y maent yn rhan mor hanfodol ohoni.

Mae'n gweld cynrychiolaeth myfyrwyr yn wir fraint ac yn gyfle gwych i sicrhau bod pryderon myfyrwyr nid dim ond yn cael eu clywed, ond hefyd y gweithredir arnynt.

Ymgeisiais am le ar y pwyllgor oherwydd fy mod wedi mwynhau fy rôl fel swyddog sabothol yn Undeb Myfyrwyr Prifysgol Southampton (SUSU), yn enwedig rhannau'n ymwneud â sicrhau ansawdd mewn AU. Fel myfyriwr sydd wedi graddio mewn Addysg ac yn astudio ar gyfer PhD mewn Addysg ar hyn o bryd, bu gennyf ddiddordeb erioed yn y ffordd y mae AU yn newid. Mae QAA yn sefydliad gwych sy'n dod â phrifysgolion ledled y DU at ei gilydd i fynd i'r afael â heriau, ac rwyf wedi mwynhau dysgu mwy am y system AU yng Ngogledd Iwerddon, yr Alban a Chymru.

Pan fydd penderfyniadau ynghylch myfyrwyr yn cael eu gwneud heb fyfyrwyr, mae'n lleihau'r tebygolrwydd y bydd y penderfyniadau hynny'n cael eu derbyn, neu hyd yn oed yn llwyddo i fynd i'r afael â'r her. Mae gweithio gyda myfyrwyr yn cymryd y dyfalu allan o ansawdd mewn AU, ac yn aml yn arwain at ddatrysiadau mwy arloesol i'r problemau mwyaf dyrys.

Rwy'n angerddol iawn am ymgysylltiad myfyrwyr o fewn y broses o newid. Boed hynny'n newid y dodrefn mewn ystafell gyffredin neu’n newid y modiwlau ar raglen astudio, dylai myfyrwyr fod yn rhan o'r sgwrs bob amser. Mae cydweithio, a lle bo’n bosibl, partneru â myfyrwyr yn helpu i wneud newid yn bosibl ac yn cynnig manteision i’r brifysgol ac i’r myfyrwyr.

Roeddwn i eisiau bod ar Bwyllgor Cynghori Strategol y Myfyrwyr QAA i helpu â gwella'r profiad addysgol a'r deilliannau ar gyfer y boblogaeth amrywiol o fyfyrwyr ar draws sefydliadau addysg uwch y DU.

Mae ymgysylltiad myfyrwyr ym mhob agwedd ar addysg bellach ac uwch yn hanfodol, gan fod hynny’n sicrhau bod cyrsiau a graddau’n berthnasol ac yn effeithiol. Pan fydd myfyrwyr yn ymwneud â llunio eu haddysg, mae'n arwain at well cymhelliant, boddhad, a llwyddiant cyffredinol, gan adeiladu diwylliant o welliant parhaus.

Rwyf yn angerddol iawn ynghylch cynrychiolaeth; credaf fod ymgysylltiad a chynrychiolaeth myfyrwyr yn mynd law-yn-llaw; mae’n amhosib cynrychioli heb ymgysylltu.

Dola yw Llywydd Addysg presennol Undeb Myfyrwyr Prifysgol Sunderland, ar ôl cymhwyso gyda gradd Meistr mewn Iechyd Cyhoeddus yn 2023. Mae ei rôl yn cynnwys bod yn llais i fyfyrwyr ar faterion academaidd, cyfrannu at ddatblygu polisïau addysgol, eirioli dros welliant parhaus mewn cymorth academaidd i fyfyrwyr a gwella gwasanaethau academaidd.

Rwy’n credu bod ymgysylltiad myfyrwyr yn bwysig ym mhob agwedd ar y daith academaidd. Mae ymgysylltiad myfyrwyr ag ansawdd yn sicrhau bod llais y myfyriwr yn cael ei ymgorffori yn y broses o wella ansawdd y ddarpariaeth, gan fod hyn yn effeithio'n uniongyrchol ar brofiad myfyrwyr, canlyniadau academaidd a boddhad myfyrwyr.

Rwy’n arbennig o angerddol am gyfranogiad myfyrwyr ym mhob penderfyniad sy’n effeithio’n uniongyrchol ar lwyddiant myfyrwyr. Pan fydd myfyrwyr yn ymwneud yn weithredol â phenderfyniadau sy'n effeithio ar eu taith academaidd, mae'n helpu i alinio strategaethau a pholisïau sefydliadol ag anghenion a disgwyliadau myfyrwyr. Rwyf hefyd yn ymddiddori'n fawr yn llwyddiant academaidd myfyrwyr a sicrhau eu bod yn cael y cymorth academaidd priodol.

Rwy'n Is-Lywydd Addysg yn Undeb Myfyrwyr Prifysgol Essex; hon yw fy ail flwyddyn yn y rôl, yn cynrychioli buddiannau academaidd myfyrwyr. Astudiais BA mewn Ysgrifennu Creadigol a gweithiais ym maes marchnata ochr-yn-ochr â'm gradd. Rhwng 2021 a 2023, bûm yn gwasanaethu ar Fwrdd Cynghori Sefydliad Born This Way Lady Gaga, sy'n gweithio i gynorthwyo â llesiant pobl ifanc a'u grymuso i adeiladu byd mwy caredig a dewr.

Rwy’n arwain tîm o dros 400 o Gynrychiolwyr Myfyrwyr, ac yn credu y dylai myfyrwyr fod yn rhan o gyd-greu pob agwedd ar eu haddysg. Mae ymgysylltu â myfyrwyr yn her fawr i’r sector ar hyn o bryd, ac rwy’n arwain prosiect gyda’n Dirprwy Is-Ganghellor Addysg o’r enw ‘Datblygu Ymgysylltiad ag Addysg’, fel rhan o Gynllun Mawr yr UM, sef prosiectau blaenllaw Arweinwyr y Myfyrwyr mewn ymateb i dros 13,000 o ddarnau o adborth myfyrwyr. Fel rhan o’m gwaith yn cynrychioli myfyrwyr ar amryw o bwyllgorau’r Brifysgol, rwy’n gweld y cysylltiadau clir rhwng ansawdd a safonau, a phrofiad bywyd y myfyrwyr. Y ffordd yr ydym yn ymdrin â myfyrwyr ac yn ymgysylltu â hwy o ran ansawdd a safonau yw sut yr ydym yn gosod ac yn codi ansawdd yr addysg a ddarparwn a sicrhau y gallwn drawsnewid bywydau.

Rwy’n angerddol ynghylch llais myfyrwyr sy’n seiliedig ar ddata a pholisi addysg, ynghyd â sicrhau ein bod yn rhoi cyfle i fyfyrwyr arwain y ffordd o ran newid, chwyldroi sut rydym yn cyfathrebu â myfyrwyr, a chymryd agwedd gydweithredol gyda phrifysgolion a’r sector AU i adeiladu dyfodol cynaliadwy.

Rwyf wedi bod yn gweithio mewn partneriaeth â nifer o adrannau ar draws sawl prifysgol gan ymhelaethu ar leisiau myfyrwyr amrywiaethol. Mae’r cyfle i gymryd rhan mewn prosiectau llais myfyrwyr ac ymchwil wedi fy ngalluogi i ennill gwybodaeth o fewn y maes, gan ychwanegu at fy mhrofiad personol o fod yn ddysgwr amrywiaethol fy hun. Rwyf nawr yn ymgymryd â chwrs PhD sy'n archwilio llais myfyrwyr cynhwysol ar gyfer dysgwyr amrywiaethol. Teimlaf y gallai fy mhrofiad personol a’m gwybodaeth o fewn y maes barhau i gefnogi cynrychiolaeth dysgwyr amrywiaethol o fewn y pwyllgor.

Myfyrwyr yw'r llais ar lawr gwlad. Mae angen i'w canfyddiad o ansawdd gael ei glywed, ei ddeall a'i ystyried wrth newid polisi er mwyn sicrhau bod canfyddiadau o ansawdd yn cyd-fynd â disgwyliadau myfyrwyr. Mae hyn yn arbennig o wir ar gyfer dysgwyr amrywiaethol, fel fi, nad ydynt yn aml yn cael eu cynrychioli mewn sicrhau ansawdd, ond sydd angen sedd wrth y bwrdd.

Mae fy niddordebau yn cynnwys llais myfyrwyr, iechyd meddwl myfyrwyr, cynrychiolaeth a chyfiawnder cymdeithasol.

Roeddwn yn Is-Lywydd Addysg yng Nghymdeithas Myfyrwyr Prifysgol Caeredin ar gyfer y flwyddyn academaidd 2022-23 ac fe wnes i wir fwynhau dysgu am brosesau ansawdd ac ymgysylltiad myfyrwyr yn y sector. Mae gennyf ddiddordeb mewn ehangu cyfranogiad ac rwyf am dynnu ar fy mhrofiadau yn gweithio mewn AU ac fel cyn-fyfyriwr prentisiaeth a chwrs mynediad.

Rwy'n meddwl mai un o fanteision gweithio gyda myfyrwyr yw cael pâr newydd o lygaid i edrych ar sut mae pethau'n gweithio, ac i ofyn cwestiynau. Yn aml, mae gan fyfyrwyr wybodaeth uniongyrchol gref o sut y gall penderfyniadau mewn polisi ac ymarfer effeithio arnyn nhw eu hunain a'u cyfoedion.

Fel cyn IL Addysg, mae fy niddordeb pennaf mewn cynrychiolaeth academaidd, a mwynheais weithio gyda chynrychiolwyr rhaglenni a phynciau. Fe wnes i wir fwynhau cynrychioli ein myfyrwyr ôl-raddedig a addysgir a PhD, a chael cyfle i ddysgu am eu hymchwil rhwng cyfarfodydd staff-myfyrwyr.

Mae Cinnomen yn fyfyriwr BSc yn y Brifysgol Agored sy'n astudio Seicoleg Fforensig; hon fydd ei phedwaredd gradd gyda'r Brifysgol Agored. Hi oedd Is-Lywydd Addysg Cymdeithas Myfyrwyr y Brifysgol Agored yn 2020-22 ac mae’n gynrychiolydd academaidd ar hyn o bryd, felly mae ganddi brofiad diweddar a diddordeb gweithredol mewn ymgysylltiad myfyrwyr, polisi academaidd a chynrychiolaeth academaidd.

Mae hi’n credu’n gryf ym mhwysigrwydd ansawdd a safonau ar draws AU ac mae wedi chwarae rhan weithredol mewn gweithgarwch sicrhau ansawdd a gwella ansawdd yn y Brifysgol. Mae hi wedi gweithredu fel Cyd-Gadeirydd ar gyfer y Grŵp Adolygu Cymheiriaid sy’n monitro’r addysgu a’r dysgu a ddarperir gan ein Byrddau Astudiaethau, a bu’n brif gynrychiolydd y myfyrwyr ar y corff sy’n ysgrifennu’r Cynllun Addysgu a Dysgu newydd sydd wedi’i roi ar waith yn y Brifysgol.

Mae hi’n angerddol am ymgysylltiad, perthyn, symudedd cymdeithasol a llais myfyrwyr, gyda ffocws penodol ar iechyd meddwl mewn AU, hygyrchedd, croestoriad, a rhoi cyfle i leisiau lleiafrifol; mae hi bob amser wedi sicrhau bod safbwynt y myfyriwr yn cael blaenoriaeth ym mhopeth y mae hi’n ei wneud.

Y tu allan i’w hastudiaethau, mae’n ofalwr llawn-amser, ac yn defnyddio’r ychydig amser hamdden sydd ganddi i sicrhau ac adeiladu ymdeimlad o gymuned i ddysgwyr o bell trwy gadeirio’r Gymdeithas Ysgrifennu Creadigol a bod yn Is-Gadeirydd Cymdeithasau yn ei sefydliad.

Bod yn rhan o gynrychiolaeth myfyrwyr oedd yr hyn a roddodd gyfle i mi brofi ymdeimlad o berthyn pan ddychwelais i Addysg yn 30 oed. Rwy’n teimlo’n angerddol iawn am lais y dysgwr ym mhob agwedd ar y profiad dysgu, hyd yn oed y rhannau hynny efallai na fydd y dysgwr byth yn eu gwerthfawrogi’n llawn nac yn ymwybodol ohonynt. Mewn AB ac mewn colegau, rydym yn cael y cyfle hwnnw i weithio gyda, dod i adnabod, datblygu ac arwain rhai o'r bobl fwyaf bregus yn ein cymunedau, sy'n wynebu rhwystrau difrifol mewn bywyd, heb sôn am ym myd addysg. Mae'n hanfodol helpu i sicrhau bod y lleisiau hyn yn cael sylw penodol yn y math hwn o bwyllgor, ac rwy'n teimlo yn fy rôl flaenorol fel Llywydd ac Is-lywydd Myfyrwyr bod dysgwyr wedi ymddiried ynof i gynyddu a hyrwyddo eu lleisiau.

Mae ymgysylltiad myfyrwyr mor bwysig oherwydd er mwyn creu’r profiad addysg gorau, mae angen i ni gadw’r myfyriwr wrth galon yr hyn a wnawn. Ac yn y pen draw, rydym ni’n atebol i’r dysgwyr hynny; os na allwn ni wneud hynny, pam rydyn ni i gyd yma?

Rwy’n angerddol iawn am gyd-gynllunio gyda’n dysgwyr ar gyfer ymgysylltiad myfyrwyr, gan fod yn greadigol yn y fordd y byddwn yn sicrhau eu cyfranogiad mewn prosesau ansawdd. O ran ansawdd (a chynrychiolaeth) ni ddylem byth aros yn llonydd; mae'r dysgwyr yn ddeinamig, yn amrywiol ac yn newid yn barhaus; dylai ansawdd fod yr un fath.

Emmanuela ydw i, myfyriwr ar gwrs gradd Meistr mewn Economeg ym Mhrifysgol Abertawe. Ochr-yn-ochr â’m hastudiaethau, rwy’n Gynorthwyydd Derbyn, yn Llysgennad Myfyrwyr Hŷn, yn Adolygydd Myfyrwyr, yn Banelydd Barn Myfyrwyr, yn Hyrwyddwr Cydraddoldeb, Amrywioldeb a Chynhwysiant Myfyrwyr yn ogystal â bod yn Intern Gwasanaethau Ansawdd Academaidd yn fy Mhrifysgol cyn hynny.

Cefais fy mhrofiad interniaeth cyntaf gyda'r tîm Gwasanaethau Ansawdd Academaidd (AQS) ym Mhrifysgol Abertawe ac rwyf wedi cael fy nenu at werthuso a gwella ansawdd byth ers hynny. Oherwydd fy niddordeb brwd, fe wnes i barhau gyda thîm AQS fel Adolygydd Myfyrwyr ar gyfer Ansawdd ac yn ddiweddarach deuthum yn aelod o'r Panel Barn Myfyrwyr.

Mae ymgysylltiad myfyrwyr ag ansawdd yn hanfodol oherwydd bod hyn yn gwella deilliannau dysgu, yn meithrin meddwl beirniadol, ac yn hyrwyddo ymdeimlad o berchnogaeth ac atebolrwydd mewn addysg, gan arwain at well perfformiad academaidd, datblygu sgiliau, twf personol a boddhad cyffredinol â'r broses addysgol. Mae ymgysylltiad myfyrwyr ag ansawdd yn hanfodol ar gyfer meithrin profiad addysgol cyflawn sydd o fudd i fyfyrwyr yn ogystal â sefydliadau addysgol.

Rwyf yn angerddol iawn am feithrin ymdeimlad o chwilfrydedd, cymhelliant cynhenid a chynhwysiant ymhlith myfyrwyr. Trwy greu amgylchedd lle maent yn teimlo eu bod yn cael eu gwerthfawrogi ac yn awyddus i ddysgu, gallwn ysbrydoli dysgwyr gydol oes sy'n mynd ati i geisio gwybodaeth a thwf personol, y tu mewn a'r tu allan i'r ystafell ddosbarth, ar gyfer myfyrwyr o bob cefndir ac anghenion.

Mae PCSM yn cyd-fynd â'm hangerdd dros wella profiad myfyrwyr a'm hymrwymiad i ragoriaeth addysgol. Rwy'n gyffrous am y cyfle i gyfrannu fy sgiliau a'm mewnwelediadau i gefnogi cenhadaeth QAA. Credaf fod mewnbwn llais myfyrwyr ar lefel strategol a gweithredol yn hanfodol i sicrhau bod sefydliadau addysgol yn parhau i ymateb i ddyheadau myfyrwyr. Rwy’n arbennig o frwdfrydig ynghylch y potensial i ysgogi newid ystyrlon a diriaethol trwy gydweithio.

Mae ymgysylltiad myfyrwyr yn effeithio'n uniongyrchol ar ddysgu a chyfranogiad myfyrwyr. Credaf pan fydd myfyrwyr yn ymwneud yn weithredol, eu bod yn fwy tebygol o deimlo cymhelliant, a gall eu hadborth ysgogi gwelliannau i sicrhau bod rhaglenni addysgol mor effeithiol ag y gallant fod.

Rwyf yn angerddol iawn am feithrin ac adeiladu ymdeimlad o gymuned. Yn ystod y flwyddyn academaidd ddiwethaf, rhoddais sylw i’r diffyg ymdeimlad o berthyn ym Mhrifysgol Manceinion, ac rwy’n frwd dros fynd i’r afael â’r mater hwn ar raddfa ehangach.

Marija ydw i, y Swyddog Cynrychiolaeth Academaidd ym Mhrifysgol Portsmouth. Ar ôl dod o gefndir addysgol gwahanol, sylweddolais yn gyflym fod yna agweddau ar y system yn Lloegr sydd ddim bob amser yn gweithio’n effeithiol i fyfyrwyr. Penderfynais ymgymryd â’r rôl hon i eirioli dros fyfyrwyr, ac i godi ymwybyddiaeth o wahanol ddulliau a allai wella eu profiad.

Rwy'n hynod angerddol am addysg flaengar a gwneud newidiadau gwirioneddol, ystyrlon. Mae ymgysylltiad myfyrwyr ag ansawdd yn hanfodol oherwydd mae myfyrwyr yn aml yn dod â phersbectif ffres, ac maent yn gyflym i dynnu sylw at yr hyn sydd ddim yn gweithio. Mae eu mewnbwn yn allweddol i wella pethau, yn hytrach na dim ond cynnal y status quo. Rwy'n canolbwyntio'n arbennig ar sicrhau bod cynrychiolaeth llais myfyrwyr yn ddilys a bod diben iddo, tra'n gwthio am newidiadau academaidd sydd wir yn helpu myfyrwyr a symud y system yn ei blaen, yn hytrach na chadw at hen ddulliau nad ydynt bellach yn berthnasol, neu sydd ddim yn gweithio mwyach.

Tra'n astudio'r gyfraith yn y brifysgol, ymgymerais â llawer o rolau arweinyddiaeth myfyrwyr i hyrwyddo'r newid yr oeddwn yn ceisio ei gyflawni, megis cynrychioli myfyrwyr o gefndiroedd lleiafrifol ar gyngor y myfyrwyr a bod yn gynrychiolydd cwrs ar gyfer fy nghyd fyfyrwyr. Agorodd hyn fy llygaid i'r problemau niferus sy’n wynebu myfyrwyr wrth iddynt geisio adeiladu eu gyrfaoedd a gwella eu bywydau.

Mae'r cyfle unigryw i ymuno â Phwyllgor Cynghori Strategol y Myfyrwyr QAA yn fy ngalluogi i ddefnyddio'r sgiliau a'r profiad a gefais o'm hamser yn y brifysgol i gyflawni newid ar raddfa llawer mwy nag a fyddai byth yn bosibl trwy un sefydliad yn unig. Rwy'n gobeithio y bydd fy nghyfnod gyda PCSM yn cyflawni datblygiad parhaol y bydd pob prifysgol sy'n gweithio gyda QAA yn ei deimlo am genedlaethau i ddod.

O fy mhrofiad i, mae ymgysylltiad myfyrwyr yn hollbwysig wrth bennu gwerth addysg ac mae pob myfyriwr rwyf wedi siarad â nhw’n cytuno â mi yn hyn o beth. Profwyd hyn i mi yn ystod fy amser yn gweithio mewn rolau cynrychioli ar ran myfyrwyr eraill. Trwy allu trafod pryderon myfyrwyr gyda staff y brifysgol ar eu rhan a lobïo’r brifysgol trwy undeb y myfyrwyr, gwelais newidiadau deinamig ym mhrofiadau myfyrwyr lle’r oedd addasiadau mewn arddull addysgu, amgylcheddau ystafell ddosbarth a strwythur cyrsiau’n galluogi myfyrwyr i ymgysylltu â’u cyrsiau mewn ffyrdd y gallent eu deall. Cyfrannodd hyn yn aruthrol nid yn unig at eu llwyddiant academaidd ond hefyd at eu profiad cyffredinol o fod yn y brifysgol.

I mi, yr hyn sydd wrth wraidd ymgysylltiad myfyrwyr mewn gwirionedd yw canfyddiadau emosiynol ac ymddygiadol myfyrwyr o addysg. Pryd bynnag y bydd myfyrwyr yn datblygu ymagwedd gadarnhaol at werth addysg, byddant am ymroi i’r addysg honno, gan eu hannog i ymwneud yn wybyddol â’r broses ddysgu ac felly gwneud y mwyaf o’u hadnoddau a’u hamser, nid yn unig wrth fynd ati i ddysgu, ond hefyd o ran deall sut i addasu eu harddull o ddysgu mewn ffordd sy'n gweithio iddyn nhw. Credaf mai cyflawni hyn yw’r nod yn y pen draw, sef cynorthwyo ymgysylltiad myfyrwyr, oherwydd dyna sy’n caniatáu i fyfyrwyr ddatblygu perthynas iach a chynaliadwy ag addysg yn annibynnol, yn ogystal â gallu cynnal cydbwysedd rhwng gwaith a bywyd sy’n addas iddyn nhw.